الحقيقة لما قولت في مرة اني بحب اعمال المخرج كريس كلومبوس .. اتاخد دا بسخرية
على ان دا مخرج افلام اطفال وافلامة تجارية و انة مفيش عمق ولا رؤية في افلامة.

بس في رأيي هو قدم رؤية لأجمل 4 افلام في تسعينات وبداية الالفينات وافلامة مازال لها صدى قوي لغايه دلوقتي زي Home Alone و Home Alone: Lost in New York وكمان فيلم هاري بوتر الجزء الاول والثاني.. وممكن حد يقول ان كتابة وسناريو ال 4 افلام دول يقدروا ينجحوا بدون وجود كولومبوس في المعادلة

بس مع بعض الملاحظة حتلاقي رؤية المخرج دا هي كل شيْ في ال 4 افلام وبدونة الافلام دي كانت حتبقي مجرد افلام موسم كريسماس مرميه في الذكريات.

كولومبوس كان ليه دايما رؤية واضحة في افلامة اللي كان بيهتم فيها دايما بأدق التفاصيل وازاي حتتصور المشاهد ودا كان بيخليه احيانا كتير اعصابة مشدودة
وفي افلامة دايما بيديك احساس الدفيء والامان والمغامره في نفس الوقت سواء دا باستخدامة بالتة الوان معينة او في تصوير الاماكن وتخيل كل شيء

وبعد نجاحة الساحق في افلام Home Alone سعى جاهدا بعد ما قرأ رواية هاري بوتر بالصدفة .. ان هو اللي يكون المخرج وراح بنفسة لـ
Warner Bros. Pictures
وعمل انترفيو معاهم عشان يوافقوا علية كمخرج.. تخيل!

واثناء تصوير الجزء الاول كان بيشتكي من ضعف الانتاج وانة مكانش معاه فلوس كفايه عشان يطلع مؤثرات بصرية بالجودة اللي كان متخيلها.. وطبعا دا كان نابع من خوف Warner Bros. Pictures من المغامره في الفيلم بما انة الجزء الاول

وبعد نجاح فيلم هاري بوتر الجزء الاول Harry Potter الميزانية كبرت للفيلم التاني
وبالتأكيد المؤثرات بقت افضل بكتيير وكمان طلع فيلم افضل من الجزء الاول ولكن عشان كل شيء بييجي بتمن ونظرا للارهاق العصبي اللي اتعرضة خلال الفيلم عشان كل شيء يطلع مزبوط واهتماما بالتفاصيل .. فضل انة يكون منتج فني فقط لباقي الاجزاء الستة

وكقاري محب لروايات هاري بوتر .. قبل ما اشوف اي فيلم كنت قريت الروايات حتى الجزء السادس وكان اترسم في خيالي صورة للأماكن والشخصيات والاحداث وكل شيء ودا من متع القراءة ان الخيال ومخك اللي هو احسن من اي كارت جرافيك بيرسملك كل شيء في خيالك

وأحيانا لما حد بيقرأ رواية بيصاب بأحباط شديد لما يشوف الفيلم الخاص بها .. لان التفاصيل بتبقي اقل .. في احداث كتير مبقتش موجودة .. في حجات كتير المخرج بيفرضها على المشاهد ودا بيسبب رفض سريع للفيلم من القراء .. لكن طبعاً مبيأثرش علي اللي بيشوفوا الافلام بس .. طبعا دا اللي حصلي بالزبط بداية من اول الجزء الرابع .. بس دا ليه مقاله تانية.

بس دا محصلش في الجزئين الأول والثاني من هاري بوتر | Harry Potter لأن كريس كولومبوس وببراعة مطلقة اهتم بكل التفاصيل .. وعلى المستوي الشخصي في مشاهد كتير جدا كانت قريبة من التخيلات اللي في بالي للرواية واماكن كانت بالزبط كما تخيلتها لما كنت بقرأ الرواية و كمان بأحترافية مفيش اي حد من القراء محسش بكل الاحداث الثانوية اللي اتلغت انها تتصور بسبب حدود وقت الفيلم اللي هو ساعتين

كريس كلوموبوس عمل ذكريات جميله في طفولتي اقدر اشوفها لغايه دلوقتي
ولغاية الآن ال 4 افلام دول من احب الافلام لقلبي
شكرا كريس كلومبوس

تعليقات على فيسبوك